ތިޔަބައިމީހުންގެ މުދަލާއި ދަރީންނަކީ ތިޔަބައިމީހުންގެ އިމްތިހާނެކެވެ.

إِنَّمَآ أَمْوَٰلُكُمْ وَأَوْلَـٰدُكُمْ فِتْنَةٌ ۚ وَٱللَّهُ عِندَهُۥٓ أَجْرٌ عَظِيمٌ (سورة التغابن 15)

މާނައީ: ތިޔަބައިމީހުންގެ މުދާތަކާއި، ތިޔަބައިމީހުންގެ ދަރިންތައް ވާކަންކަށަވަރީ، އިމްތިޙާނެއް ކަމުގައެވެ. އަދި ބޮޑުވެގެންވާ ދަރުމަހުރީ، اللَّه ގެ ޙަޟްރަތުގައެވެ.

ތަފްސީރުގައި ވަނީ: ތިޔަބައިމީހުން އަތުގައި ހުރި މުދަލާއި، މާތް ﷲ ތިޔަބައިމީހުންނަށް ދެއްވި ދަރީންގެ ނިޢުމަތަކީ މާތް ﷲ ގެ ޙަޟްރަތުން ކުރައްވާ އިމްތިޙާނެކެވެ. އެކަލާނގެއަށް ކިޔަމަންވަނީ ކާކުތޯއާއި އުރެދެނީ ކާކުތޯ ބެއްލެވުމަށެވެ. މާތް ﷲ ގެ ޙަޟްރަތުގައިވާ އަޖުރާއި، ދަރުމަ ދުނިޔޭގެ ވަގުތީ އުފަލަށްވުރެ މާ ހެޔޮކަން ބޮޑުވެގެން ވެއެވެ. ވީއިރު، މާތް ﷲ އަށް ކިޔަމަންވުން ފިޔަވައި މުދަލާއި، ދަރިން ތިޔަބައިމީހުން މަޝްޣޫލުކުރިޔަ ނުދޭށެވެ. 

މި ކޮލަމުގައި މި ގެނެސްދެނީ، ބަޔާން ވެގެންވާ ފަސޭހަ ތަފްސީރުގެ ދިވެހި ތަރުޖަމާއިން ނަގައިފައިވާ ކުދިކުދި އެހެނަސް ފައިދާ ހުރި ވާހަކަތަކެވެ. މި ފިލާވަޅުތަކުގެ ޢިބުރަތް އަޅަމެންނަށް ފަހުމުކޮށްދެއްވާނދޭވެ! آمين.