މާތް الله ގެ މަތިވެރި އަމުރުފުޅު

وَأْمُرْ أَهْلَكَ بِٱلصَّلَوٰةِ وَٱصْطَبِرْ عَلَيْهَا ۖ لَا نَسْـَٔلُكَ رِزْقًا ۖ نَّحْنُ نَرْزُقُكَ ۗ وَٱلْعَـٰقِبَةُ لِلتَّقْوَىٰ (سورة طه: 132)

މާނައީ: އަދި ކަލޭގެފާނުގެ އަހުލުވެރިންނަށް ނަމާދުކުރުމަށް އަމުރުކުރައްވާށެވެ! އަދި އެކަމުގެ މައްޗަށް ކެތްތެރިވެވަޑައިގަންނަވާށެވެ! ރިޒުޤުދެއްވުމަކަށް ކަލޭގެފާނުގެ ކިބަޔަކުން ތިމަންރަސްކަލާނގެ އެދިވޮޑިއެއް ނުގަންނަވަމެވެ. ކަލޭގެފާނަށް ރިޒުޤުދެއްވަނީ، ތިމަންރަސްކަލާނގެއެވެ. ރަނގަޅު ނިމުންވަނީ، ތަޤްވާވެރިންނަށެވެ. 

ތަފްސީރުގައި ވަނީ: ކަލޭގެފާނުގެ އަހުލުވެރިންނަށް ނަމާދަށް ރައްކާތެރިވުމަށް އަމުރުކުރައްވާށެވެ. އަދި ނަމާދު އޭގެ ރުކުންތަކާއި އަދަބުތަކާއެކު ފުރިހަމަކުރެއްވުމާއި، ޚުޝޫޢަތްތެރިކަމާއެކު އަދާކުރެއްވުމުގެ މައްޗަށް ކަލޭގެފާނު ކެތްތެރިވެވަޑައިގަންނަވާށެވެ. ކަލޭގެފާނު އެއްވެސް މީހަކަށް ރިޒުޤުދެއްވުމަށް ތިމަންރަސްކަލާނގެ އެދިވޮޑިނުގަންނަވަމެވެ. އަދި ކިއެއްތަ ކަލޭގެފާނަށް ރިޒުޤުދެއްވަނީ ތިމަންރަސްކަލާނގެއެވެ. އަދި ހުރިހާ ޚަލްޤުތަކުންނަށް ރިޒުޤު ދެއްވަނީ ތިމަންރަސްކަލާނގެއެވެ. ރަނގަޅު ނިމުން ވަނީ ތަޤްވާވެރިންނަށެވެ.

މި ކޮލަމުގައި މި ގެނެސްދެނީ، ބަޔާން ވެގެންވާ ފަސޭހަ ތަފްސީރުގެ ދިވެހި ތަރުޖަމާއިން ނަގައިފައިވާ ކުދިކުދި އެހެނަސް ފައިދާ ހުރި ވާހަކަތަކެވެ. މި ފިލާވަޅުތަކުގެ ޢިބުރަތް އަޅަމެންނަށް ފަހުމުކޮށްދެއްވާނދޭވެ! آمين.