ތިބާ ބޮޑާވެގެން ބިމުގައި ހިނގައިނޫޅޭށެވެ!

وَلَا تَمْشِ فِى ٱلْأَرْضِ مَرَحًا ۖ إِنَّكَ لَن تَخْرِقَ ٱلْأَرْضَ وَلَن تَبْلُغَ ٱلْجِبَالَ طُولًا (سورة الإسراء: 37)

މާނައީ: އަދި ތިބާ، ބޮޑާވެގެން ބިމުގައި ހިނގައިނޫޅޭށެވެ! ހަމަކަށަވަރުން، ތިބާޔަކަށް ބިންގަނޑު ފޫވައްޓައެއް ނުލެވޭނެތެވެ. އަދި ފަރުބަދަތަކާ ހަމަޔަށް ދިގުވެގެންވެސް ތިބާޔަކަށް ނުދެވޭނެތެވެ.

ތަފްސީރުގައި ވަނީ: އަދި އަމިއްލަ ނަފްސާމެދު ފަޚުރުވެރިވެ، ބޮޑާވާ ޙާލު ތިބާ ބިންމަތީގައި ނުހިނގާށެވެ. ފަހެ، އިންސާނާއެވެ! ތިބާއީ ބަލިކަށި ނިކަމެތި މީހެކެވެ. ބޮޑާވުމަކީ ތިބާޔާ އެކަށީގެންވާ ކަމެއް ނޫނެވެ. އެހެނީ، ތިބާގެ ހިނގުމުން ބިންގަނޑު ފޫވައްޓާލައި، ތިބާއަށް ކިޔަމަން ކުރުވައި، ތިބާގެ މަތިވެރިކަން އެބިމަކަށް ނުދެއްކޭނެއެވެ. އަދި ތިބާ ފަރުބަދަތަކާ ހަމައަށް ދިގުވެގެންގޮސް ފަރުބަދަތަކުގެ ކުރިއާ ހަމައަށް ނުފޯރާނެއެވެ. މިއާޔަތުގައި މިވަނީ ބޮޑާވާ މީހުންނަށް ފުރިހަމަ ރިވެތި ޢިބާރާތުން މަލާމާތްކުރައްވާފައެވެ. ޝާޢިރަކު ބުނެފައިވަނީ ވަރަށް ފުރިހަމައަށެވެ. وَلَا تَمْشِ فَوْقَ الْأَرْضِ إِلَّا تَوَاضُعَا فَكَمْ تَحْتَهَا قَوْمٌ هُمُو مِنْكَ أَرْفَعُ (ތިބާ މަޑުމައިތިރިކަމާއެކުގައި މެނުވީ ބިންމަތީގައި ނުހިނގާށެވެ. އެބިމުގެ އަޑީގައި ތިބީ ތިބާއަށް ވުރެ މަތިވެރި ކިތައްމީހުން ބާވައެވެ؟)

މި ކޮލަމުގައި މި ގެނެސްދެނީ، ބަޔާން ވެގެންވާ ފަސޭހަ ތަފްސީރުގެ ދިވެހި ތަރުޖަމާއިން ނަގައިފައިވާ ކުދިކުދި އެހެނަސް ފައިދާ ހުރި ވާހަކަތަކެވެ. މި ފިލާވަޅުތަކުގެ ޢިބުރަތް އަޅަމެންނަށް ފަހުމުކޮށްދެއްވާނދޭވެ! آمين.