ތަޤްވާވެރިންނަށް ވަޢުދުކުރައްވާފައިވާ ސުވަރުގެ

مَّثَلُ ٱلْجَنَّةِ ٱلَّتِى وُعِدَ ٱلْمُتَّقُونَ ۖ فِيهَآ أَنْهَـٰرٌ مِّن مَّآءٍ غَيْرِ ءَاسِنٍ وَأَنْهَـٰرٌ مِّن لَّبَنٍ لَّمْ يَتَغَيَّرْ طَعْمُهُۥ وَأَنْهَـٰرٌ مِّنْ خَمْرٍ لَّذَّةٍ لِّلشَّـٰرِبِينَ وَأَنْهَـٰرٌ مِّنْ عَسَلٍ مُّصَفًّى ۖ وَلَهُمْ فِيهَا مِن كُلِّ ٱلثَّمَرَ‌ٰتِ وَمَغْفِرَةٌ مِّن رَّبِّهِمْ ۖ كَمَنْ هُوَ خَـٰلِدٌ فِى ٱلنَّارِ وَسُقُوا۟ مَآءً حَمِيمًا فَقَطَّعَ أَمْعَآءَهُمْ (سورة محمد: 15)

މާނައީ: ތަޤްވާވެރިންނަށް ވަޢުދުކުރައްވާފައިވާ ސުވަރުގޭގެ މިސާލަކީ އެތާނގައި ތަޣައްޔަރުކަމެއްނުވާ، ސާފު ފެނުގެ ކޯރުތަކާއި، އޭގެ ރަހަ ތަފާތުނުވާ ކިރުގެ ކޯރުތަކާއި، ބޯމީހުންނަށް މީރުރަހަ ލިބެނިވި، ރާގެ ކޯރުތަކާއި، ސާފު މާމުއިގެ ކޯރުތައްވާ ސުވަރުގެއެވެ. އަދި އެތާނގައި އެއުރެންނަށްޓަކައި ހުރިހާ ބާވަތެއްގެ މޭވާތަކާއި، އެއުރެންގެ ވެރިރަސްކަލާނގެ ޙަޟްރަތުން ފާފަފުއްސެވުންހުށްޓެވެ. (މި ހުރިހާ ނިޢުމަތްތައް ލިބިގެންވާ މީހުންނާއި) އެމީހަކު ނަރަކައިގައި ދެމިހުރެ، އަދި ކެކިކެކިހުރި ހޫނުފެނުގެ ބުއިން އެއުރެންނަށް ބޯންދެއްވުމުން، އެއުރެންގެ ގޮހޮރުތައް ބުރިބުރިވެގެންދާ މީހުންނާ އެއްފަދަވެގެން ވޭހެއްޔެވެ؟

ތަފްސީރުގައި ވަނީ:  މިތާނގައި މިސާލު ގެންނަވާފައި މިވަނީ މިސާލުޖެއްސެވުމަކަށް ނޫނެވެ. ސިފަކުރެއްވުމަށެވެ. މާނައީ: އެތަނުގެ ރީތިކަމާއި ފުރިހަމަކަމުގައި މިސާލެއްފަދަ، ޢަޖާއިބުކުރުވަނިވި، އެފަދަ ދެވަނައެއް ނުވާ ސުވަރުގޭގެ ސިފައަކީ މިއީއެވެ. އެތަނުގައި ތަފާތު ވައްތަރުގެ ކޯރުތައް ވެއެވެ. އެއީ ދުނިޔޭގެ ކޯރުތައް ފަދައިން ތަޣައްޔަރުވެ ކިލަނބުވާ ކޯރުތަކެއް ނޫނެވެ. އެއީ އެއްވެސް ކިލަނބުކަމެއް ނުސާފުކަމެއް ނުވާ ސާފު ކޯރުތަކެވެ. އޭގެ ތެރޭގައި ސަލްސަބީލުގެ ކޯރުތައް ވެއެވެ. ﴿مِّن مَّآءٍ غَيْرِ ءَاسِنٍ﴾ ގެ މާނައީ އެއްވެސް ކިލަނބުކަމެއް ނެތި ސާފުވުމެވެ. އަދި ދުވަސްވުމުގެ ސަބަބުން ތަޣައްޔަރުވެފައި ނުވުމެވެ. އެކޯރު ފެށެނީ ގޮމަކަސްތޫރީގެ ފަރުބަދައަކުންނެވެ. ﴿وَأَنْهَـٰرٌ مِّن لَّبَنٍ لَّمْ يَتَغَيَّرْ طَعْمُهُۥ﴾ އަދި ނުހަނު ހުދު އެހާމެ ސާފު ކިރުގެ ކޯރުތަކެވެ. އެ ކިރު އަންނަނީ ގެރި ބަކަރީގެ ވައްގަނޑުތަކަކުން ނޫނެވެ. ﴿وَأَنْهَـٰرٌ مِّنْ خَمْرٍ لَّذَّةٍ لِّلشَّـٰرِبِينَ﴾ އަދި ރަހަމީރު ރާގެ ކޯރުތަކެވެ. އޭގައި ނުބައި ރަހައާއި ވަހެއް ނުވެއެވެ. ނަފްސު އެއަށް ފަކުރުގަންނަ، މިޒާޖު ފާސިދުވެފައިވާ މީހުން ނޫނީ ނުބޯ ދުނިޔޭގެ ރާފަދައިންނެއް ނޫނެވެ. އެކަލާނގެ ﴿لَّذَّةٍ لِّلشَّـٰرِبِينَ﴾ އޭ ވަޙީކުރެއްވީ ދުނިޔޭގައި ރާގައިވާ ބުއްދި ފިލައިދިއުމާއި، ބޮލުގައި ރިއްސުން ފަދަ ނުބައި ސިފަތައް ދުރުކުރެއްވުމަށެވެ. އިބްނު ޢައްބާސް رضي الله عنهما ވިދާޅުވިއެވެ. "ރާގައި ހަތަރު ހުތުރު ސިފައެއް ވެއެވެ. އެއީ މަސްތުވުމާއި، ބޮލުގައި ރިއްސުމާއި، ހޮޑުލެވުމާއި، ކުޑަކަމުދިއުމެވެ." (ތަފްސީރު އިބްނިކަޘީރް، ސޫރަތުއް ޞާއްފާތި، އާޔަތް: 47) މާތް ﷲ ވަނީ ސުވަރުގޭގެ ރާ އެ ހުތުރު ސިފަތަކުން ސާފުކުރައްވާފައެވެ. އެކަލާނގެ ވަޙީކުރައްވަނީ ﴿لَّا يُصَدَّعُونَ عَنْهَا وَلَا يُنزِفُونَ﴾ އެބަހީ އެ ބުއިމުގެ ސަބަބުން އެބައިމީހުންގެ ބޮލުގައި ނުރިއްސާނެއެވެ. އަދި އެބައިމީހުން މަސްތުވެ ބުއްދި ފިލައިނުދާނެއެވެ. ﴿وَأَنْهَـٰرٌ مِّنْ عَسَلٍ مُّصَفًّى﴾ އަދި ރަހަ މީރު ކުލަ ރީތި ނުހަނު ސާފު މާމުއިގެ ކޯރުތަކެވެ. އެއީ މާމުއި ކުޅަނދުރުގެ ބަނޑުން ނުކުންނަ މާމުޔެއް ނޫނެވެ. ސުވަރުގެއިން އަރައިގެން ދެމޭ ކޯރެވެ. އަދި އެބައިމީހުންނަށް ސުވަރުގޭގައި ބާވަތް ބާވަތުގެ މީރު މޭވާތައް ވެއެވެ. އަދި އެ މާއްދީ ނިޢުމަތުގެ އިތުރަށް އެބައިމީހުނަނަށް ރޫޙާނީ ނިޢުމަތް ވެއެވެ. އެއީ މާތް ﷲ އެބައިމީހުންގެ ފާފަ ފުއްސަވައިދެއްވުމާއި، އެކަލާނގެ ރަޙްމަތާއި، ރުއްސެވުމެވެ. عَنْ أَبِي سَعِيدٍ الْخُدْرِيِّ، قَالَ قَالَ رَسُولُ اللَّهِ صلى الله عليه وسلم ‏"‏إِنَّ اللَّهَ يَقُولُ لأَهْلِ الْجَنَّةِ يَا أَهْلَ الْجَنَّةِ‏.‏ يَقُولُونَ لَبَّيْكَ رَبَّنَا وَسَعْدَيْكَ‏.‏ فَيَقُولُ هَلْ رَضِيتُمْ فَيَقُولُونَ وَمَا لَنَا لاَ نَرْضَى وَقَدْ أَعْطَيْتَنَا مَا لَمْ تُعْطِ أَحَدًا مِنْ خَلْقِكَ‏.‏ فَيَقُولُ أَنَا أُعْطِيكُمْ أَفْضَلَ مِنْ ذَلِكَ‏.‏ قَالُوا يَا رَبِّ وَأَىُّ شَىْءٍ أَفْضَلُ مِنْ ذَلِكَ فَيَقُولُ أُحِلُّ عَلَيْكُمْ رِضْوَانِي فَلاَ أَسْخَطُ عَلَيْكُمْ بَعْدَهُ أَبَدًا‏"‏‏. – (صحيح البخاري، كتاب التوحيد، باب كلام الرب مع أهل الجنة) (އަބޫސަޢީދު އަލްޚުދްރީ رضي الله عنه ގެ އަރިހުން ރިވާވެގެން ވެއެވެ. އެކަލޭގެފާނު ވިދާޅުވިއެވެ. ރަސޫލުﷲ ﷺ ޙަދީޘުކުރެއްވިއެވެ. ހަމަކަށަވަރުން މާތް ﷲ ސުވަރުގޭގެ އަހުލުވެރިންނަށް ވަޙީކުރައްވާނެއެވެ. އޭ ސުވަރުގޭގެ އަހުލުވެރިންނޭވެ! އެބައިމީހުން ދަންނަވާނެއެވެ! އާދޭހެވެ. އަޅަމެން މިތިބީ އަޑުއަހައި ކިޔަމަންވެގެންނެވެ. ދެން އެކަލާނގެ ވަޙީކުރައްވާނެއެވެ. ތިޔަބައިމީހުން ރުހިއްޖައީމުހެއްޔެވެ؟ އެހިނދު އެބައިމީހުން ދަންނަވާނެއެވެ. އަޅަމެންގެ ވެރިރަސްކަލާކޮ! އަޅަމެން ނުރުހެންވީ ކީއްވެގެންތޯއެވެ؟ އިބަރަސްކަލާނގެ އެއްވެސް މަޚްލޫޤަކަށް ނުދެއްވާ ވަރަށް އަޅަމެނަށް ދެއްވައިފީމުއެވެ. ދެން އެކަލާނގެ ވަޙީކުރައްވާނެއެވެ. އެއަށްވުރެ މާ ހެޔޮކަން ބޮޑު އެއްޗެއް ތިމަންރަސްކަލާނގެ ދެއްވާހުށީމެވެ. އެހިނދު އެބައިމީހުން ދަންނަވާނެއެވެ. އަޅަމެންގެ ވެރިރަސްކަލާކޮ! އެއަށްވުރެ ހެޔޮކަން ބޮޑީ ދެން ކޮން އެއްޗެއްތޯއެވެ؟ އެކަލާނގެ ވަޙީކުރައްވާނެއެވެ. ތިޔަބައިމީހުންނަށް ތިމަންރަސްކަލާނގެ ރުހިވޮޑިގަތުން ދެއްވައިފީމެވެ. ދެން ދުވަހަކުވެސް ތިޔަބައިމީހުންގެ މައްޗަށް ކޯފާވެވޮޑިގަތުމެއް ނުވެއެވެ.) (ޞަޙީޙުލް ބުޚާރީ، ޙަދީޘު: 7518) އެ ދާއިމީ ނިޢުމަތުގައި ވާ މީހާ ނަރަކައިގައި ދާއިމަށް އޮންނަ މީހާއާއި އެއްފަދަ ވާނޭ ހެއްޔެވެ؟ ސުވަރުގޭގެ އަހުލުވެރިންގެ ބުއިމުގެ ބަދަލުގައި އެބައިމީހުން ބޯނީ ކެކިކެކި ހުންނަ ހޫނު ފެނެއެވެ. އެފެނުން އެބައިމީހުންގެ ގޮހޮރުތައް ބުރިބުރިވެގެންދާނެއެވެ.

މި ކޮލަމުގައި މި ގެނެސްދެނީ، ބަޔާން ވެގެންވާ ފަސޭހަ ތަފްސީރުގެ ދިވެހި ތަރުޖަމާއިން ނަގައިފައިވާ ކުދިކުދި އެހެނަސް ފައިދާ ހުރި ވާހަކަތަކެވެ. މި ފިލާވަޅުތަކުގެ ޢިބުރަތް އަޅަމެންނަށް ފަހުމުކޮށްދެއްވާނދޭވެ! آمين.