ރޯދަވީއްލާ ވަގުތު

ރޯދަވީއްލާ ވަގުތަކީ ވަރަށް މުހިންމު ވަގުތެކެވެ. އެއީ ތަރުބިއްޔަތުގެ ވަގުތެކެވެ. އެ ވަގުތުގެ ހުރިހާ އަހަންމިއްޔަތެއް ކެއުމަށް އެކަނި ހުސްކޮށްނުލާށެވެ. ސުފުރާމަތީ ކާން އިށީންނަގޮތަށް މަޣްރިބްނަމާދުގެ ވަގުތު ފިލައިދަންދެން ކެއުމުގައި މަޝްޣޫލުވެގެން އެ ތަނުގައި މަޑުނުކުރާށެވެ. ނުވަތަ ނަމާދުކުރަން އުނދަގޫ ވާވަރަށް ގިނައިން ނުކާށެވެ. ރޯދަވީއްލާ ވަގުތު މަދުން ކެއުމަށް ތިބާގެ އަމިއްލަ ނަފުސަށާއި އަނބިދަރިންނަށް ހަނދާންކޮށްދޭށެވެ. އެ ވަގުތު ގިނައިން ކެއުމަކީ ރޭގަނޑުގެ އެހެން އަޅުކަންތަކަށް ބުރޫއަރާނެ ކަމެއް ވެސް މެއެވެ.

ރޯދަވީއްލަނީ އަޅުކަމެއް ފުރިހަމަކުރާށެވެ. އެ ދުވަހު ހިފި ރޯދަ ފުރިހަމަވާ ވަގުތަކީ އެއީއެވެ. މުޅި ދުވަހު އީމާންތެރިކަމާ އެކު ސަވާބަށް އެދިގެން ހިފި ރޯދަ، ރޯދައަކަށް ވަނީ ރޯދަވީއްލުމުންނެވެ.  މި ފަދައިން ރަމަޟާންމަހުގެ ދުވަސްތަކުގައި ރޯދަހިފާ މީހާގެ އިސްވެދިޔަ ހުރިހާ ފާފައެއް ފުއްސަވާނެ ކަމުގެ އުފާވެރި ޚަބަރު ނަބިއްޔާ صَلَّىٰ اللهُ عَلَيْهِ وَسَلَّم ވަނީ ދެއްވައިފައެވެ. عَنْ أَبِي هُرَيْرَةَ قَالَ، قَالَ رَسُولُ اللَّهِ صَلَّىٰ اللهُ عَلَيْهِ وَسَلَّم «مَنْ صَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ» (البخاري) މާނައީ: "އަބޫ ހުރައިރަތުގެފާނުގެ ކިބައިން ރިވާވެގެން ވިއެވެ. رَسُولُ اللَّهِ صَلَّىٰ اللهُ عَلَيْهِ وَسَلَّم ޙަދީޘްކުރެއްވިއެވެ. "އީމާންކަމާއި ސަވާބަށް އެދި ރަމަޟާންމަހުގެ ރޯދަހިފައިފި މީހާގެ އިސްވެ ގޮސްފައިވާ ފާފަތައް ފުއްސަވާނެތެވެ."

ކަދުރުން ރޯދަވީއްލުމަކީ ސުންނަތެކެވެ. ރޯދަވީއްލާނެ ކަދުރެއް ނުލިބުނު ނަމަ، ރޯދަވީއްލަން ވާނީ ފެނުންނެވެ. ރޯދަވީއްލާ ވަގުތު ކިޔާން ވާރިދު-ވެފައި އޮންނަ އެއް ދުޢާއަކީ "ذَهَبَ الظَّمَأُ وَابْتَلَّتِ الْعُرُوقُ وَثَبَتَ الأَجْرُ، إِنْ شَاءَ اللَّهُ" މިއެވެ. މާނައީ: "ކަރުހިއްކުން ފިލައްޖެއެވެ. ނާރުތައް ތެމިއްޖެއެވެ. ﷲ އިރާދަކުރެއްވިއްޔާ އަޖުރު ސާބިތުވެއްޖެއެވެ." މި ދުޢާ ދަސްކޮށް ކިޔަން އާދަކުރާށެވެ!

ރޯދަވީއްލާ ވަގުތަކީ ރޯދަވެރިޔާއަށް އުފާ ހާސިލުވާ ވަގުތެކެވެ. ރޯދަވެރިޔާއަށް ދެ އުފަލެއް ވާކަމަށް ރަސޫލާ صَلَّىٰ اللهُ عَلَيْهِ وَسَلَّم ވަނީ ޙަދީޘް-ކުރައްވައިފައެވެ. «لِلصَّائمِ فَرْحَتَانِ: فَرْحَةٌ حِيْنَ يَفْطَرُ، وَفَرْحَةٌ حِينَ يَلْقَى رَبَّهُ» މާނައީ: "ރޯދަވެރިޔާއަށް ދެ އުފަލެއް ވެއެވެ. ރޯދަވީއްލާ ވަގުތުގެ އުފަލާއި އޭނާގެ ރައްބާ ބައްދަލުވާ ވަގުތު ލިބޭ އުފަލެވެ." މިއީ ދުނިޔެ މަތީގައި ލިބޭ އުފަލަކާއި އާޚިރަތުގައި ލިބޭ އުފަލެއްގެ ވާހަކައެވެ. އޭގެން ފުރަތަމަ އުފަލަކީ ރޯދަވީއްލުމުން އޭނާގެ ހައިހޫނުކަން ފިލައި-ދިޔުމާއި ކަރުހިއްކުން ފިލައިދިޔުމެވެ. މިއީ ޠަބީޢީ ހިތްހަމަޖެހުމެކެވެ. ދެވަނަ އުފަލަކީ އާޚިރަތުގައި އޭނާގެ ވެރިރައްބާ ބައްދަލުވާ ހިނދު އޭނާ ހިފި ރޯދަ ޤަބޫލުވެގެން ވާކަން އޭނާއަށް އެނގުމާއި،  އެ ރޯދައިގެ ސަބަބުން ލިބެން އޮތް އަޖުރު ފުރިހަމައަށް ލިބި ކާމިޔާބުވާ މީހުންގެ ތެރެއިން ހިމެނުމުން ލިބޭ އުފަލެވެ. މިއީ ރޯދަވީއްލާ ވަގުތުގެ ބައެއް ވާހަކައެވެ.  

މިއީ ދީނުގެމަގު 269ވަނަ ނަންބަރުގައި الشَّيْخُ مُحَمَّدُ أَفْضَلْ ލިޔުއްވައިފައި އޮތް ލިޔުއްވުމެކެވެ.