ފާފަކުރުން ދޫކޮށްލުމަށް އެހީތެރިވެދޭނެ ބައެއް ކަންކަން.

الحَمْدُ لِلَّهِ وَالصَّلَاةُ وَالسَّلَامُ عَلَى رَسُولِ اللَّهِ وَعَلَى آلِهِ وَصَحْبِهِ وَسَلَّمَ.

ފާފަކުރުން ދޫކޮށްލުމަށް އިންސާނާއަށް އެންމެ ބޮޑަށް އެހީތެރިވެދޭ ކަމަކީ މާތް ﷲއަށް ބިރުވެތި-ވުމެވެ. އަދި الله تعالىގެ، މި ވަޙީބަސްފުޅު އަބަދު ވެސް ހަނދާނުގައި ބެހެއްޓުމެވެ. "އޭ އިންސާނާއެވެ. ހަމަކަށަވަރުން ތިބާއީ، ތިބާގެ ރައްބުގެ ޙަޟްރަތަށް ދިޔުމަށް، ވަރަށް ބޮޑަށް ގަދައަޅައި މަސައްކަތްކުރާ މީހެކެވެ. ފަހެ ތިބާ (އެ މަސައްކަތާއިގެން) އެއިލާހާ ބައްދަލުވާނެތެވެ." (އިންޝިޤާޤް: 6) އަދި މީގެ އިތުރަށް އޭނާ ޔަޤީންކުރަން ޖެހޭނެ އަނެއް ކަމަކީ ކޮންމެ ޢަމަލެއް ކުރި ކަމުގައި ވިޔަސް، އޭނާ އެ ކުރި ޢަމަލަކައިގެން ކޮންމެވެސް ދުވަހަކުން، އޭނާގެ ވެރިރައްބާ ބައްދަލުކުރަން ޖެހޭނެ ކަމެވެ.

ދެވަނައީ: ފާފައިގެ ނިމުމާ މެދު ވިސްނައި ފިކުރުކުރުމެވެ. ފާފަކުރުމުގެ ނިމުމަކީ ކޮބައިހެއްޔެވެ؟ ފާފައިގެ ނިމުންވަނީ ވަރަށް ނުބައިކޮށެވެ. އޭގެ ސަބަބުން މާތް ﷲއަށް އުރެދުމަކީ ވަރަށް ކުޑަކުޑަ ލުއިކަމަކަށް ފާފަކުރާ މީހާއަށް ވެގެންދެއެވެ. އަދި ޝިރުކުކުރެވޭ ހިސާބަށް ދަންދެން ޝައިޠާނާއާ އެކު އޭނާ އުޅެއެވެ. ޢިލްމުގެ އަހުލުވެރިން ވިދާޅުވެއެވެ. ހަމަކަށަވަރުން ފާފައަކީ ޝިރުކަށް ގެންގޮސްދޭ އެއްޗެކެވެ. މާނައަކީ އިންސާނާ ފާފަކުރުމުގައި، މަރުޙަލާއަކަށް ފަހު މަރުޙަލާއެއް ކަޑައްތުކުރަމުން-ގޮސް، އޭގެ އެންމެ ކޮޅުނެއްކޮޅަށް ވާޞިލުވެއެވެ. އެފަދަ ކަންކަމުން ރައްކާތެރިކޮށްދެއްވުމަށް، އަހަރުމެން ﷲގެ ޙަޟްރަތުން އެދެމެވެ. الله تعالىގެ އަންނަނިވި އާޔަތް، މި ކަމަށް ދަލީލުކޮށްދެއެވެ. "ތިމަން އިލާހުގެ އާޔަތްތައް އޭނާއަށް ކިޔައިދެއްވާ ހިނދު، އޭނާ ބުނެއެވެ. (ތިޔައީ) އެވޭލާ މީހުން ދައްކައިއުޅުނު ފުލޯކު ވާހަކަތަކެވެ. ހަމަހިލާ އެހެންނަކުން ނުވާނެއެވެ. އަދި ކީއްހެއްޔެވެ؟ އެ މީހުން ހޯދައިއުޅުނު ޢަމަލުތަކުގެ ސަބަބުން އެ މީހުންގެ ހިތްތަކުގައި ދަބަރުޖަހާފައި ވެއެވެ."  (އަލްމުޠައްފިފީން: 13-14) ފަހެ ފާފަތަކުގެ ސަބަބުން ހިތުގައި ދަބަރުޖަހައި ތޮށްޓެއް ލެވުމުން، الله تعالىގެ އާޔަތްތައް، އެ މީހުންނަށް ފެންނަނީ އެވޭލާ މީހުން ދައްކައިއުޅުނު ފުލޯކު ވާހަކަތަކެއް ފަދައިންނެވެ. ފަހެ އިންސާނާ ފާފަތަކުގެ ނިމުމާ މެދު ވިސްނާ ފިކުރުކުރުމަކީ، ފާފަކުރުން ހުއްޓައިލެވޭނެ ސަބަބެކެވެ.

ތިންވަނައީ: ފާފަކުރުމުން އޭނާއަށް ލިބެނީ ހަމައެކަނި الله تعالىއާ ދުރުވުންކަން ދަތުމެވެ. އަދި الله تعالىއާ ދުރުވެއްޖެ ނަމަ، މުޖުތަމަޢުގެ މީހުން ވެސް އެ މީހަކާ ދުރަށްޖެހި ފެއަށް ދެއެވެ. އެހެނީ އިންސާނާ الله تعالىއާ ދުރުވެއްޖެއްޔާ އޭނާގެ ހިތުގައި އެކަނިވެރިކަން އުފެދެއެވެ. އަދި އޭނާގެ ކުރިމަތީގައި ހުރި ޞަފުޙާއަކުން އޭނާގެ ޢައިބުތަކާއި ފާފަތަށް މީސްތަކުންނަށް ފެންނަން ހުންނަކަހަލައެވެ. އޭނާގެ އަމިއްލަ ނަފުސާމެދު ދެކޭނީ ނިކަމެތިކަން އޭނާގެ މައްޗަށް ލިޔެވިފައި ވާ މީހަކު ފަދައިންނެވެ. ފަހެ މިފަދަ ކަންތައްތަކާމެދު ވިސްނާ ފިކުރުކުރުމަކީ ފާފަކުރުން ދޫކޮށްލުމަށް އެހީތެރިވެދޭނެ ކަމެކެވެ.

ހަތަރުވަނައީ: ފާފަކުރެވެނީ ނުރަނގަޅު މީހުންނާ އެކު އުޅެވޭތީކަމަށް ވާނަމަ، އެ މީހުންނާ އެކަހެރިވެ ދުރުވާށެވެ. އެހެނީ ނަބިއްޔާ صَلَّىٰ اللهُ عَلَيْهِ وَسَلَّم ނުބައި އެކުވެރިޔާ އަޅާކިޔުއްވާފައި ވަނީ ކަނބުރުވެރިޔާއާއެވެ. އެކަލޭގެފާނު ޙަދީޘްކުރެއްވިއެވެ. "އޭނާ ތިބާގެ ހެދުން އަންދައިލާނެއެވެ. ނުވަތަ އޭނާގެ ކިބައިން ތިބާގެ ގައިގައި ނުބައި ވަހެއް ހިފާނެއެވެ." (صحيح البخاري: 5534)

މަޞްދަރު: لقاء الباب المفتوح 6/103.

މިއީ ދީނުގެމަގު 250ވަނަ ނަންބަރުގައި نَظِيم نِظَام ލިޔުއްވާފައި އޮތް ލިޔުމެކެވެ.