10 އަހަރަށްފަހު ދިމިޝްގު އެއާޕޯޓުން ބައިނަލްއަގުވާމީ ދަތުރުތައް އަލުން ފަށަނީ

ސީރިއާގެ ވެރިރަށް ދިމިޝްގުގެ ބައިނަލްއަގުވާމީ ވައިގެ ބަނދަރުން އަންނަ އަންގާރަ ދުވަހުން ފެށިގެން ބޭރުގެ ޤައުމުތަކަށް ދަތުރުތައް ފެށުމަށް ހަމަޖެހިފައިވާ ކަމަށް ސީރިއާގެ ސިވިލް އޭވިއޭޝަން އެންޑް އެއާ ޓްރާންސްޕޯޓް އޮތޯރިޓީގެ ވެރިޔާ އަޝަދު އަލް-ސުލައިބާ ބުނެފިއެވެ.

ސީރިއާގެ ސަރުކާރުގެ ނޫސް އޭޖެންސީ ސަނާއަށް ނޫސް ބަޔާނެއް ދެެއްވަމުން އަލް-ސުލައިބީ ވިދާޅުވީ، ބައިނަލްއަގުވާމީ އެހީތެރިކަމާއެކު ދިމިޝްގު އަދި ސޫރިޔާގެ އެހެން އެއާޕޯޓުތައް އަލުން ރަނގަޅު ފެންވަރަކަށް ގެނައުމުގެ މަސައްކަތް ކުރަމުންދާ ކަމަށާއި ޖެނުއަރީ 7 ވަނަ ދުވަހުން ފެށިގެން ދިމިޝްގު އިންޓަނޭޝަނަލް އެއާޕޯޓުން ބައިނަލްއަގުވާމީ ދަތުރުތައް ފެށާނޭކަމަށެވެ.

ދިމިޝްޤުގެ އެއާޕޯޓް ބައިނަލް އަޤުވާމީ ޚިދުމަތަށް  މެދުކެނޑިފައި އޮންނަތާ ވަނީ 10 އަހަރަށްވުރެ ގިނަ ދުވަސްވެފައެވެ . 

ގަތަރު އެއަރވޭޒްއިން ވަނީ ދިމިޝްގަށް އަލުން ދަތުރުތައް ފަށާ ފުރަތަމަ ބައިނަލްއަގުވާމީ އެއަރލައިންގެ ގޮތުގައި އަންގާރަ ދުވަހުން ފެށިގެން ހަފްތާއަކު ތިން ދަތުރު ކުރާނެކަން އިއުލާނުކޮށްފައެވެ.